Dopu avè cercatu, in vanu, à fà valè i so diritti di ghjucà i « play-off » o di cullà direttamente in Lega Una, l’ACA, chì aspetta avà, l’esamine di u so casu da u Cunsigliu di Statu per a settimana chì vene, ripiglia, à pocu à pocu a so vita…
Dopu à l’arrestu di e cumpetizione, u sedeci di marzu scorsu, l’ACA, chì sperava sin’à a fine, di pudè ghjucà in « play-off ». s’hè battutu per fà valè diritti vinti nantu à u terrenu. Ma, è dopu à parechji episodii, sò a LFP è a FFF ch’anu chjosu di manera definitiva a porta. Di fattu, ci vole à ricunnosce chè e strutture di ghjocu à ballò naziunale anu mancatu di cuerenze in e so scelte, è favurazatu tensione interne…Un affare di più di dui mesi. Cus`;i, à a fine di u scunfinamentu, i ghjucadori bianchi è rossi anu aspettatu…Certi eranu pertutu in Cuntintente, d’altri sempre quì, tutti pronti à ripiglià. Finalmente, tuttu u mondu hè, oghje, in vacanze. Ancu s’è a decisione di u Cunsigliu di Statu, a settimana scorsa, di dumandà à a LPF, d’ùn fà micca falà Nè Tulusa, nè Amiens rimette l’affare nantu à a tola…Da u cantu di l’ACA, si tratta dighjà di staghjone vene chì pudaria principià u 22 d’aostu. Tandu a squadra di l’Orsu s’appronta in issu sensu quì. Per ciò chì tocca à u gruppu, si sà chè Laçi, Coutadeur è Huard, tutti i trè in fine di cuntrattu anu prulungatu sin’à u 2023. Bayala, Courtet, Flips, Diallo è Cluyters, (imprestu) voltanu ind’e so squadra. L’ACA hà fattu firmà à Faïz Mattoir è Sidney Obissa in tantu chè prufessiunali. Portanu à sette, cù Mounaim El Idrissy, Lucas Marsella , Jérémy Corinus, Yanis Ciminignani è Tony NJilé, u numaru di ghjucadori passati prufessiunali questu annu. S’è noi aghjustemu à i fratelli Tramoni è François Joseph Sollacaro, l’ACA averà 10 ghjucadori passati per u centru di furmazione d’aostu. Un gruppu forse d’una vintena di membri, ripiglierà u 24 di ghjugnu. Dopu à una spassighjata in furesta di Vizzavona, parterà in staziu in Anglet, cum’è sempre. Aspettendu a ripresa di u campiunatu. Ultima sperenza -minima- di ghjucà i « play-off », u passaghju davanti à u Cunsigliu di Statu, a settimana chì vene. In casu mai, a LFP serà custretta di fà quantunque un bellu sceccu…
