U ghjovanu atletu isulanu, chì hà fattu e so prove incù u triathlon, hà decisu di fà d’aostu, u « Mare à mare », un trail chì franca a Corsica da levante à punente. Novanta chilometri cù cinque mille metri di dislivellu. Una sfida maiò per Baptiste chì vole, à tempu, batte a prova suprana di tredeci ore è cinquanta minute…
Ci sò sfide chì contanu ind’una vita. Quella chì hà da pruvà à riesce Baptiste Saez l’ottu d’aostu prussimu ne face parte. È micca una sfida minore. Francà solu, a Corsica da levante à punente, (Ghisunaccia à Purtichju) un percorsu chjamatu « Mare à mare ». Novanta chilometri in tuttu è cinque mille metri di dislivellu pusitivu… Atletu specializatu in u triathlon, Baptiste Saez, membre di u CTCA, hè statu campione di Corsica da u 2012 à u 2016. Una disciplina, spiccata in trè (ciclisimu, corsa à pedi, nutera) chè l’atletu isulanu pratica, à parità cù u trail. Hà compiu, in u 2018, « L’imperiale trail » in cinque ore è vinti minute (sessantatrè nantu à quattru centu). Cusèi, s’appronta à u « Mare à mare », passendu u so tempu trà l’isula è Parrighji induve ellu studiente in u sport (recuperazione, alimentazione…). « Aghju principiatu l’appruntera di a sfida di ghjennaghju, spiega u ghjovanu, facciu à pocu pressu dece ore dd’attvità fisica à settimana è aghju fattu dapoi u principiu di l’annata, più di seicentu chilometri. » L’ottu d’aostu, divaria esse prontu per a so sfida. Una sfida arrimbata à un’altra. Quella di batte a prova suprana di Dominique Herzet l’annu scorsu (tredeci ore è cinquanta minute…
