I dece ghjucadori chì cumponenu a sezzione « Foot per tutti » di l’US Vicu Dui Sorru anu participatu, à u principiu di u mese, à una ghjustra internaziunale chì s’hè tenuta in Cagliari à mezu à delegazione ghjunte da parechji paesi di u mondu. I Viculacci anu riesciutu à finisce à a quarta piazza d’issa ghjustra.
Si chjamanu Christophe, Paul, Michaël, Pierre-Xavier, Cédric, Nathanael, Jeff o Valentin è anu campatu un mumentu strasordinariu i 5, 6 è 7 di dicembre scorsu in Cagliari induve ci era una ghjustra internaziunale cù a participazione di dodeci squadre ghjunte d’Italia, Monaco, Nova Zelanda, Brasiliu…Frà elli, a squadra « Foot per tutti » di l’US Vicu Dui Sorru. Una cuppa di u mondu dedicata à athleti svantagiati per una cumpetizione piuttostu nantu à u mudelu Futsal. « Semu stati invitati dopu à un cuntattu cù Monaco, spiega Sébastien Rocca, respunsevule di a squadra, cù Jean-Louis Moreno, avemu appruntatu i ghjucadori in issa perspettiva quì. Sò pertuti cù l’idea di fà una cumpetitizione. Fù un mumentu strasordinariu per tutti. »
Dopu à una prima fasa di qualità (9 punti, vittoria 6-0 di fronte à Auckland, 4-0 contru à Arles è 7-1 di fronte à Isolotto, è una sola scunfitta 0-3 contru à Monaco), i Viculacci anu ottenutu u so bigliettu per a fasa finale. Quì, anu persu in meza finale di fronte à Monaco ma finiscenu à una bella quarta piazza. « Trè ghjorni cù assai emuzione, aghjusta Sébastien Rocca, aldilà di i resultati, tuttu u mondu hè vultatu u core pienu di ricordi strasordinarii. » U Diu vi Salvi Regina hà ribumbatu in a sala di a cumpetizione di Cagliari. I Viculacci ponu esse fieri ma ùn contanu micca di piantà si quì. « Semu in cuntattu cù Modena per participà à una nova cumpetizione di marzu prussimu. » Un appuntamentu pigliatu.
