ACA-Laval 2-0 (0-0)
Stadiu François Coty
Tempu frescu
Terrenu bon
2500 spettatori à pocu pressu
Realisazione : Touzghar (60a), Nouri (94+4 p.)
Avertiti : ACA: Sollacaro (33a), Laval :Vargas (90+1), Samassa (90+3)
ACA : Sollacaro- Youssouf, Campani, Vidal, Strata (Abergel 87a)- Mangani (cap.), Jabol, Marchetti- Bammou (Nouri 87a), Touzghar (Touré 76a), Jacob (Chegra 57a) : addestratore : O. Pantaloni
Laval : Samassa- Baudry, Baldé, Diaw (Tell 75a)- Gonçalves (Bobichon 68a), Sanna (Adeoti 82a), Thomas, Cherni (Seidou 82a)- Vargas, Tchocounté, Labeau-Lascary (Kadile 68a)
Dopu à un maccione, l’ACA s’hè pagatu à Laval, issu marti sera in Timizolu (2-0). L’Aiaccini vincenu una piazza à a classifica (7i) ma ùn sò ch’à dui punti di a quarta piazza.
L’Aiaccini aspettavanu un macciu riferenza. È s’ellu ci n’era u bisognu, masimu dopu à tanti cuntenuti boni in Timizolu, u fattu di fà cascà u capimachja di Lega dui, issu marti in Timizolu, hà datu a cunferma chè issa squadra quì pò ghjucà un rolu interessante questu annu. Ma l’affare ùn hè micca statu faciule di fronte à una squadra capimachja dapoi quindeci macci è senza scunfitta fora di casa dapoi u cinque d’aostu in Troyes (cinque vittorie è duie parità in spiazzamentu sin’à…Timizolu).
Eppuru, l’ACA devia fà senza sette ghjucadori (Chanot suspesu, Michel, Quemper, Benaïm, Bayala, Baretto, Avinel) cù Touzghar è Jacob ch’ùn eranu micca à centu per centu. Di fattu, in issu macciu chjosu durante a maiò parte di u tempu, ci hè vulsutu à aspetta l’ora di ghjocu. Pochi occasione in primu tempu fora d’una magnifica ripresa vultata di Jacob passata vicinu di a cabbia di Samassa (8a) è d’un tiru di Bammou cuntratu da un pede avversariu (36a). Un macciu chì s’hè passatu in mezu terrenu. Tuttu s’hè ghjucatu in secondu tempu. Dopu à un calciu d’angulu stucciatu da Mangani, Jabol hà rimessu u ballò versu Touzghar chì hà marcatu d’un ballunettu davanti à a cabbia.
Malgratu u ritornu d’un difensore per sgaggià lu (60a). Laval hà pigliatu a suprana mittendu in periculu a difesa aiaccina ma i « bianchi è rossi » anu tenutu u colpu. Tchokounté (capata vicinu à a cabbia, 65a) è sopratuttu Thomas (capata cacciata da una tamanta prova di Sollacaro, 71a), anu fattu tremulà i sustenidori aiaccini. Eppo, in fine di partita, dopu u sbagliu d’un difensore, Touré si n’hè andatu solu davanti à Samassa ch’ùn hà pussutu chè scartà lu di e mani. Penalty trasfurmatu da Nouri (90+4). L’Aiaccini pudianu festighjà issa bella vittoria…
