U BCA urganizeghja, issu sabbatu (20.00), una reunione di pugilatu, a seconda dopu à quella di maghju scorsu. Quattordeci cumbatti amatori è unu prufessiunali sò privisti. L’occasione di fà u puntu nantu à u club è a disciplina cù Petru Paoli, capimachja di u BCA…
-Cumu si prisenta issa nova reunione?
Propiu bè! Avemu travagliatu durante mesi sani per urganizà una reunione di qualità maiò. À u BCA, tuttu u mondu s’hè impegnatu assai per fà, d’issu mumentu, a festa di u Pugilatu corsu. Una disciplina chì si rilancia in Corsica, terra di pugilatu…
Ci pudete parlà di i participanti?
Ci seranu quattordeci cumbatti amatori cù una selezzione di Montpellier di pettu à atleti ghjunti di i quattru club di Corsica: sette da u BCA, trè di u Ring Aiaccini, dui di u Boxing Club di Balagna è dui di u Ring Bastiacciu cù a prima participazione di u figliolu di Gilles Simeoni, presidente di l’Esecutivu di Corsica. In fine, un cumbattu prufessiunale trà Lucas Migotti (Montpellier), ch’era dighjà quì l’ultima volta, è Javier Cordoba, un Argentinu chì campa in Sicilia. Sò dui atleti di a categuria di i menu di sessantasette chilò (welters). Ci serà a pisata sta sera à u Lurettu.
À chì ne semu di u BCA?
Cumencia à ripiglià fiatu dopu à mumenti difficiuli. A merria d’Aiacciu ci hà permessu d’avè una sala più maiò. Ne semu à una cintena di licenziati cù assai ghjovani di tredeci anni. Un inseme chì ci permette di travaglià in cundizione bone. Avemu una disciplina populare aperta à tutti. Speremu d’avanzà à pocu à pocu.
Eppuru, un atletu prufessiunale hè un spechju impurtante per una struttura. Saria un scopu à più o menu longu andà per u BCA?
E cundizione ùn sò più listesse dapoi parechji anni. Un cumbattante prufessiunale deve avè un travagliu, di più intrenamenti, di più regularità è tuttu què dumanda un impegnu difficiule da tene. Ma, a sapete, avemu avutu cù Raybier, Biggi, Nieddu è d’altri, atleti di quì furmati ind’è noi. Senza cuntà Poilblanc o Noto…Avemu da travaglià cù i ghjovani sperendu di sbuccà, un ghjornu prussimu nantu à un ghjovanu chì puderà purtà l’altri zitelli di u club daretu à ellu.
