U Palatinu accoglie issu sabbatu a cinquesima edizione di a notte spurtiva di i cumbatti. Una manifestazione urganizata da u BCA di Petru Paoli è l’Aiacciu Muya Thaï di Petru Sanna chì metterà in vale, dodeci cumbatti in e duie discipline. Frà elli, un campiunatu d’Auropa Muay Thaï cù l’Aiaccinu Thibault Arias, campione di Francia, di fronte à l’atletu di Cecchia Ladislav Kristufek. Bellu spettaculu in perspettiva…
Ghjè un bellu spettaculu ch’elli puderanu vede l’amatori di Pugilatu è quelli di a disciplina « vicina » Pede-Pugni (Muay Thaï, K1), issu sabbatu à u Palatinu, un locu di predilezzione per issu genaru d’evenimentu. Cusì, ci seranu dodeci cumbatti. Avemu da ritruvà uni pochi d’atleti benchè amatori, dighjà cunnisciuti. Cum’è per indettu, i ghjovani Quentin Audibert (R Aiaccinu) o Youssef Belkaïd (BCA) ma dinò, è sempre in Pugilatu d’altri cum’è Sebastianu Cuttuli (BCA). Da u cantu di i prufessiunali, Jo Legato (R Bastiacciu) volta à a cumpetizione dopu à a so scunfitta in Bastia di nuvembre scorsu.
Per ciò chì tocca à i « Pede è Pugni », U fattu maiò d’issa serata serà, di sicuru, u campiunatu d’Auropa Muay Thaï trà Thibault Arias (Aiacciu Muay Thaï) è l’atletu ceccu Ladislav Kristufek. Daretu, l’amatori d’issa disciplina anu da pudè ritruvà trè cumnatti in Muay Thaï è unu in K1. Una bella serata chì hà da pudè mette in vale isse duie discipline.
