A famiglia di u Cross Country s’era adunita issa dumenicata in u duminiu Peraldi induve era urganizata intornu à a cunvivialità è di sicuru, l’aspettu cumpetitivu, a 39a edizione di u memuriale Alain Le Moal.
Un tempu bellu assulanatu, atleti ghjunti da tutti i club di Corsica, un’ambianza fraterna, un bellu spiritu da i chjuchi à i più maì,a trentanovesima edizione di u Memuriale Alain Le Moal, fundadore u quattordeci d’ottobre di u 1969 di a famose struttura u CAA. Hè issu club quì purtatu da u so presidente MIchel Huertas, chì hà vulsutu rendeli umaggiu cù issa corsa, tutti l’anni. Issa dumenica, eranu 440 à participà à ciò chè a famiglia di a corsa à pede isulana cunsidereghje cum’è un evenimente maiò per tutti i fideli. Principiata cù u Cani-Cross (un cane è u so maestru), cù trentatrè squadre, a manifestazione hà cunnisciutu un successu maiò postu chè tutte e categurie eranu prisente per un percorsu più o menu difficiule secondu à u nivellu, à mezu à e vigne di u duminiu Peraldi. L’aspettu spurtivu avia, certu, a so impurtanza ma micca solu. L’ambianza, a cunvivialità è i raporti umani trà a ghjente ch’aspettava i participanti, masimu i parenti di i più chjuchi, hà pigliatu a suprana. À l’arrivu Mathieu Desbraux et u so figliolu Petru anu vintu a catéguria di l’omi, Yves Mainos hà pigliatu a terza piazza. Ind’è e femine, Maryline Demangel, Tiphaine Firroloni è Charlotte Idda piglianu e trè prime piazza. Un’uchjata ind’è i più ghjovani induve François Leandri è Tiphaine Brihaye, tutti i dui « ciucci » scrivenu u so nome. Una bella ghjurnata compia à mezu à un barbecue tamantu per i participanti è so famiglie.
