U Sporting s’appronta à rinvivisce a so fiara antica

0

27208468-27525527Ghjè un macciu particulare ch’elli ghjocanu i Bastiacci issu sabbatu di fronte à Le Mans in cuppa di Francia. L’occasione, d’un cantu, di sperà viaghjà in issa cumpetizione, è di sente, da l’altru, u perfumu di u so passatu…

Dodeci d’aostu u duie mila ondeci, eccu a traccia di l’ultima partita trà u Sporting è Le Mans in Lega una. Una vittoria, per a « sturietta » (1-0) è dodeci mila parsone in u stadiu Armand Cesari. Issu sabbatu, è dunque sette anni dopu, ùn seranu forse micca dodeci mila  à sustene i Turchini ma si pò pensà quantunque chè a mezana di quattru mila serà largagementu francata, forse ancu dubbiata. Tuttu u mondu a sà chè i Bastiacci ùn sò micca à a so piazza à issu nivellu quì in Naziunale trè è dinò ch’ellu serà monda difficiule di vultà d’un colpu, in u mondu prufessiunale. Ci vulerà tempu. « À viaghju longu, passu misuratu » dice u pruverbiu. Ma, oghje, à u Sporting li piacerrebe à misurà si à squadre prufessiunale, niente chè per sente l’odore di issi macci quì chì ci ramentanu un passatu…vicinu. È què, ùn ci hè chè a cuppa di Francia chì u puderà fà. Aldilà d’un  macciu induve i Bastiacci volenu scuzzulà a ierarchia di fronte à u secondu di u Naziunale unu, a cuppa di Francia hè l’occasione di lascià, da cantu, qualchì mumentu, u campiunatu, è di sperà andà u più luntanu pussibile in cuppa. È perchè micca ghjucà una Lega Una in Furiani ? Frà tempu, ci hè a squadra di Le Mans chì sbarca in Furiani…Cù un percorsu similare. Vultata da l’infernu (Divione d’onore in u 2013), ghjè, oghje, vicina da la Lega dui. Un esempiu da seguità, forse, per u Sporting. È di sicuru, un maccione issu sabbatu, in Furiani…

Partager.

Réagir en direct