U Sporting hà suffertu di fronte à Saint Omer

0

A storia hà da ritene chè i Bastiacciu ghjucheranu i 32me di finale di a cuppa di Francia, à u principiu di ghjennaghju. ma di fronte à una squadra di Saint-Omer chì ùn avia pocu da perde, l’omi di Stefanu Rossi sò stati custretti à a prolungazione sabbatu scorsu in Furiani…

sans-titreDiciamu, pocu  tempu fà dopu à a vittoria di u GFCA di fronte à Beaucaire chè l’impurtante, in cuppa di Francia, pocu impreme a manera, era di francà u giru. I Bastiacci n’anu fattu a prova stu sabbatu di fronte à Saint-Omer. Un macciu chì era statu rimessu a settimana scorsa per via di u gattivu tempu. Sette ghjorni dopu, i Turchini anu avutu e ghjambe appena debbule chè anu suffertu per francà l’ottesimu giru di a cuppa. Masimu ch’elli ghjucavanu in casa soia. Sta volta, nè ventu, nè acqua ma unu di sti macci chì v’addurmentanu. È, forse, una squadra bastiaccia chì si vidia dighjà di ghjennaghju di fronte à Concarneau, prussimu avversariu. Si ne sò scurdati, chè u ghjocu à ballò, ùn hè una scenza ghjusta è chè ci vole sempre à rispettà u so avversariu. L’occasione di marca durante e novanta prime minute funu poche. Una suprana, di sicuru, ma, à tempu, un ghjocu cù pocu ritimu, assai sbagli diretti è, in fine, a più bella occasione per Saint-Omer (80ma). Finalmente, ci hè vulsutu ad aspettà a prolungazione per vede i Turchini ottene u so bigliettu cù trè realisazione di Schur subbitu (94ma), Santelli (103ma) è Mesbah (112ma). Una vittoria (3-1) è l’assicuranza di cuntinuà u percorsu. Ma ci hà da vulè à mustrà altre affare per sperà cuntinuà…

Partager.

Réagir en direct