U giru di Corsica in periculu?

0

Secondu à l’urganizatori di a parte francese di u campiunatu di u mondu automobile, u Giru di Corsica saria minacciatu. Vultatu in u 2015 à u nivellu mundiale dopu à sei anni di « purgatoriu » in Campiunatu d’Auropa IRC è ERC , saria, oghje, minacciatu da paesi cum’è u Giapponu.  Per avà, l’edizione 2019 saria mantenuta. L’avvene?  Risposta  u 12 d’ottobre….th

S’è noi sfugliemu e pagine di u Giru di Corsica automobile, vedimu subbitu ch’è issa cumpetizione face parte dapoi a so nascita ind’è l’anni cinquanta, di a vita isulana. Megliu, i spurtivi maiò ch’anu participatu à iss’evenimentu, piglianu sempre a so difesa. Hè  li stessu per e stituzione, cum’è a Federazione Francese (FFA) o Internaziunale (FIA). E ci n’hè bisognu ch’ è oghje,  a cumpetizione hè, torna una volta minacciata. Cacciata in u 2009  da u Campiunatu di u mondu (per mette l’Alzazia à a so piazza), a manifestazione, ancu cambiata (accurtata) per risponde à regule mundiale, era  vultata trè anni fà. Ma si sà, per disgrazia, ch’è l’interessi suldarini piglianu sempre a suprana nantu à a dimensione spurtiva. Tandu, u « nostru » giru hè dinò minacciatu. Ch’è i prumutori novi  ch’urganizeghjanu u Campiunatu di u Mondu (Red Bull TV), volenu investisce u mercatu di l’Asia o di l’America Suttana. Si trattaria dunque di caccià u Giru di Corsica è ancu quellu di Sardegna per mette d’altri paesi (Giapponu, Chili…) menu famosi ma…Tandu, l’almanacchera pudaria scambià dinò. Per u 2019, u Giru di Corsica saria mantenutu. Per ciò chì tocca à l’avvene, risposta u 12 d’ottobre dopu  à u cunsigliu mundiale di u sportu automobile… 

Partager.

Réagir en direct