L2 : U GFCA pudia sperà megliu in Metz (1-0)

0

20181126_25_3_1_0_0_obj18966026_1_xwh_642x490_xwhL’Aiaccini, chì si spiazzavanu ind’è u capiclassifica, anu fattu un maccione, forse, una di e più belle prestazione dapoi u principiu di a stagione. Hè mancatu pocu per piglià, omancu un puntu centu volte meritatu ma si sà chì in ghjocu à ballò, l’impurtante hè di marcà…

U Gaz face a so strada dapoi ch’ellu hè ghjuntu Hervé Dellamagiore. L’addestradore novu di a squadra rossa è turchina, mette, à pocu à pocu, a so manu è si vede nantu à u terrenu. Dopu à trè vittorie di fila-una in cuppa di Francia- s’aspettava quantunque à una partita difficiule in Metz, capiclassifica di Lega dui chì mette, d’altronde, una pressione maiò nantu à l’altre squadre. Ma, dopu à novanta minute ghjucate, u sintimu ch’è no pudemu avè saria piuttostu quellu di un dispiace maiò chè l’Aiaccini anu fattu un macciu di quelli, pigliendu a suprana nantu à i so avversarii a maiò parte di u tempu. Ci hè vulsutu un penalty (appena duru) per permette à l’omi d’Antonetti di piglià si i trè punti. Per u restu, un bellu stucciu di Roye (27a), un’occasione tamanta d’Armand (53a) o una capata di Guidi (81a) anu datu a frebba à i ghjucadori di Metz è ancu à i so sustenitori. Hè mancatu pocu per ottene, omancu a parità in issa partita quì, forse appena d’ambizione in più o di precisione in l’ultima passa…Oghje, ùn pudemu esse, di sicuru, suddisfatti d’una scunfitta ma, dopu à u 5-0 di Lens, i prugressi d’issa squadra sò quì. È u cuntinutu d’issu macciu ci pò dà cunfidenza per a seguita di u campiunatu…

Partager.

Réagir en direct