Hervé Della Maggiore : « U gruppu hè capace à reagisce »

0

rencontre_avec_le_nouveau_coach_du_gfca_herve_della_maggiore_full_actuL’addestradore novu di u GFCA hà cunnisciutu una prima partita difficiule, luni scorsu in u Nordu. Una scunfitta 5-0, un macciu piegatu in vinti minute, sbagli maiò in primu tempu è dighjà una pressione nanzu di riceve à Béziers, issu vennari in Mezavia. Hervé Della Maggiore ci dà u so parè nantu à issi punti, vinti quattru ore nanzu à u so primu macciu à u stadiu Ange Casanova…

Chì pensate di a scunfittta in Lens luni sera ?

Hè sicuru ch’è noi ci aspittavamu à una partita assai difficiule. Ùn vogliu micca cercà scusi ma mancavanu parechji ghjucadori è avemu ghjucatu una di e squadre maiò d’issu campiunatu. Stu macciu m’hà, quantunque permessu di mette u ditu nantu à certi prublemi è di cercà soluzione. Avà, ci tocca à cuncentrà ci nantu à a ghjunta di Béziers, issu vennari. Aspettu una reazzione di u gruppu…

Ci hè dighjà a pressione nantu à e spalle di i vostri ghjucadori ?

Aspettu, nanzu à tuttu, una reazione d’orgogliu. Ma hè vera ch’ùn basterà micca. Ci vole à prupone una certa filusuffia di ghjocu, quella chì mi curresponde. Hè vera ch’ùn aghju micca avutu troppu tempu. Sapemu ciò chì ci vole à fà, ne semu cuscenti ma ùn vogliu micca parlà di pressione. A pressione, a mettu piuttostu in u ghjocu. Semu  à u primu terzu di u campiunatu, a stagione hè longa. Stemu nantu à stu macciu. Ci tocca à mette tuttu ciò chì ci vole per pudè vince. Ci anu da aspettà, a sapemu è sò dinò periculosi fora di casa, serà un macciu difficiule, ma ci vole à esse capace di mette una pressione, d’avè intenzione di ghjocu. A difficultà serà d’andà in davanti è, à tempu, d’ùn esse troppu esposti. Hè quì, pensu, l’imbusca di a partita.

Chì saria u vostru dispusitivu favuritu ? Cuntate di scambià per rapportu à quellu vistu in Lens ?

Ùn la sò à dilla franca. Ogni partita t’hà a so verità. Ci vole, quantunque, à fà campà u ballò. Ci seranu, di sicuru, scambiamenti à u nivellu di i ghjucadori. Ci vole à piglià cunscenza chè u macciu di Lens era un « accidente » chì ci hà da permette di fà prugressi. Sò cunvintu chè u gruppu hè capace à reagisce. È quì,  hè prisente à u nivellu di u spiritu, quessa hè una bona. Contu nantu à tuttu u mondu per andà à cercà issa vittoria…

Partager.

Réagir en direct