C. Gianni: « Sculpì a Sfida Natura in capu à i zitelli, hè a nostra più grande vittoria »

0

8927930-14154710Respunsevule  di a Sfida Natura, una manifestazione nata in u 2007,  dedicata à ghjovani da 14 à 17 anni, è  urganizata da a CTC, l’anzianu ghjucadore di u GFCA Handball, Cristofanu Gianni, face u riassuntu di a dodecesima edizione chì s’è tenuta da u primu à u trè di ghjugnu in i Dui Sorru…

Ch’è bilanciu  pudete prisintà di a 12ma edizione di a Sfida Natura?

Ghjè un bilanciu assai pusitivu. Ciò chì hè, d’altronde, u casu tutti l’anni. U percorsu era statu previstu in i Dui Sorru, da sopra à Vicu è i paesi di u circondu. A manifestazione hà adunitu 40 squadre è 120 participanti, masci è femine. Per certi, era a prima volta, d’altri voltanu tutti l’anni postu ch’è si pò fà da 14 à 17 anni, vale à dì quattru anni. Hè una riesciuta maiò…

Chì ne pensanu i ghjovani chì ci participeghjanu?

Cum’è l’aghju detta, certi voltanu tutti l’anni. Ci hè un impegnu maiò postu ch’à ogni edizione, semu custretti, per a securità, di limità e scrizzione à 120 participanti. E ogni volta, semu cumpletti. Senza cuntà, a pussibilità di pudè scopre certe discipline spurtive per praticà le dopu. Quessa dinò, hè una bona. Masimu di fà  scopre à tutti issi ghjovani, e discipline liate à a natura.

Chì hè u scopu?

Per i ghjovani, hè una cumpetizione. Ma ùn si « vince » nulla. E à tempu, monda. A cunniscenza di i siti isulani è u piacè d’esse inseme. Hè per quessu ch’è noi vulemu andà più luntanu ch’è i scopi liati à una sola disciplina spurtiva. Hè una furtuna di pudè sparte mumenti cusì, à iss’età quì. Sculpisce a Sfida Natura  in  capu à i zitelli, hè quessa a nostra più grande vittoria.

Partager.

Réagir en direct