« Affare » GFCA-Paris FC : u ghjestu di Pierre Feracci

0

GFCA-PFCDopu à quattru mesi d’un imbrogliu tamantu à mondu, l’affare GFCA-PFC hà cunnisciutu, luni sera, una fine favurevule à u GFCA. U presidente di u PFC, Pierre Feracci hà decisu d’ùn accettà a pruposta di u CNOSF chì li dava quantunque a vittoria. Un’attitudine di classa in u mondu prufessiunale chì perde appena u capu. Masimu à u nivellu amministrativu…

Era ora ! Pocu impreme u resultatu, a sapemu, oghje, chè, di regula, ùn si deveria più sente parlà di u macciu GFCA-PFC di u 27 di lugliu scorsu. Ancu di grazia ! Chè issu « filmettu » hà cunnisciutu quattru atti : u primu quand’è Aron Boupendza, ghjucadore imprestatu da Bordeaux, entre nantu à u terrenu u 27 di lugliu mentre ch’ellu era suspesu. Resultatu : malgratu a parità (1-1), trè punti per i Parighjini. Attu dui : Appellu di u GFCA chì ghjustifecheghja a so pusizione è i so diritti spienchendu chè u nome di Boupendza ùn ci era nantu à a lista di i ghjucadori suspesi. Resultatu : torna à una volta parità. Attu trè : a squadra parighjina chjama à u CNOSF chì, in fine, prupone di dà li a vittoria. Resultatu : cacciemu un puntu à unu è ne demu trè à l’altru. À dilla franca, ci hè da perde u ciarbellu cù tutti issi imbrogli matematichi. Ancu assai chè Pierre Feracci, u presidente di u PFC, hà messu tuttu u mondu d’accordu luni sera, ricusendu d’accettà di seguità quella pruposta. « Dapoi u principiu, aghju dumandatu di dà ci i trè punti è di dà ne à tempu unu à u Gazelec chì era in u so dirittu. Ma mi pare chè a LFP ùn hà pussutu gestisce bè issu cartulare. Tandu, a faremu à l’accortu, aviu dettu à i dirigenti aiaccini ch’e vuliu piuttostu una furmulazione 3+1, ùn si pò fà,tandu lascemu corre. U PFC è u GFCA ùn averanu bisognu d’issu puntu di ghjugnu prossimu… »

A classa…

Partager.

Réagir en direct