ACA-Le Havre : rivincita o solu trè punti à piglià ?

0

aca-hac-2-750x410Secondu à  i sustenitori aiaccini di l’Orsi Ribelli, u macciu di fronte à Le Havre da quì à una settimana in Timizolu saria monda aspettatu. Di fattu è aldillà di a classifica debule di i bianchi è rossi, ci saria quantunque un’ « odore » di rivincita quattru mesi dopu à una partita ch’avia, torna una volta, prisentatu u ghjocu à ballò corsu è l’ACA cum’è un « gattivu » sughjettu. N’hè passatu, dapoi, acqua sottu à i ponti. À chì ne seremu vennari u 19 d’ottobre ?

21 di maghju di u 2018. Dopu à una partita « particulare » (fù rimessa à u stu ghjorni quì dopu à una storia di panna di u carru avversu), l’ACA vince u so bigliettu per ghjucà contru à Tulusa per una piazza in Lega una. A seguita, tuttu u mondu a cunnosce. Un primu macciu ghjucatu in Montpellier senza alcunu sustenitore, un pacchettu di suspensione (Pantaloni, Selemani, Sainati, Coutadeur). In fine, una piazza in Lega una persa senza avè la ghjucata da veru…

À chì ne semu oghje, quattru mesi dopu? À dilla franca, a pressione hè calata ancu s’è a maiò parte di l’attori seranu sempre quì, vennari u 19 in Timizolu. Per ciò chì tocca à u nivellu spurtivu, ci vole  à ricunnosce chè i scopi ùn sò listessi per e duie squadre. L’ACA cerca à caccià si da a fine di a classifica è ùn puderà, forse, ghjucà a listessa piazza chè l’annu scorsu. Si tratta, per avà, di mantenimentu in Lega 2. Per a squadra di Le Havre, l’affare hè pocu cambiata. Settesima di a classifica (à 5 punti di Brest, u terzu), a squadra di Nurmandia pò sempre sperà. U fattu hè di sapè s’è l’ACA è i sustenitori averanu u penseru à qualchi spiritu di rivincita o s’ellu ci vole solu à pensà à i trè punti. Masimu chè i « bianch’è rossi » sò, per avà in periculu cù solu 9 punti è una piccula 17ma piazza à a classifica. Tandu l’affare saria chjaru. Trè punti, pocu impreme u nome di l’avversariu. Da a capacità à gestisce issu macciu, à mette ciò chì hè accadutu di maghju da cantu, dipende, di sicuru, u resultatu. È attenti chè, torna una volta, i media naziunale è quelli chì sò à u capu di a LFP aspettanu dinò qualchì imbrogliu per fà falà dinò e so sintenze…Ùn demu micca u bastò…

Partager.

Réagir en direct