Adel Ayadi : percorsu d’un passiunatu

0

 

Circhemu, di tantu in tantu, à trattà, pocu impreme a disciplina, di spurtivi pocu cunnisciuti. Adel Ayadi, ghjucadore di Bastelicaccia (Na0ziunale trè), ne face parte. Anzianu attaccante, ghjoca dapoi uni pochi d’anni, in difesa induve e so qualità li permettenu di sprimasi megliu…

Hè a sturietta d’un zitellu passiunatu di ghjocu à ballò. È s’ellu ghjoca, oghje, à u nivellu amatore, u so percorsu l’hà permessu di francà categurie per ghjunghje, cù a so squadra di Bastelicaccia, à u nivellu di a Naziunale trè (dopu àvè toccu à u CFA 1). Un percorsu principiatu da zitellu è sin’à tredeci anni à l’ASPTT induve ellu ampara e base di u ballò nanzu d’esse campione di Corsica cù l’ACA (13 anni) è di vince, un annu dopu, sempre in biancu è rossu, a cuppa di Corsica (15 anni). Eppo, in u 2009, l’attaccante ferma à u Gazelec per trè stagione. Ghjucherà qualchì macciu in CFA, u so più altu nivellu sin’ ad avà. È dopu à un’altra sperienza à l’ACA (campione di divisione onore) è una stagione sana in CFA2, si ne và in Bucugnà. Hè quì chè l’addestradore, Didier Lelong u scambia di piazza è u face passà d’attaccante à difensore centrale. « Per via di e mio qualità », spiega u ghjucadore, un postu ch’ùn aghju più lasciatu dapoi. »

Dopu à trè stagione, accetta una scumessa nova rispundendu à a pruposta di Jean-Luc Luciani cù Bastelicaccia è passa da a divisione onore (torna una volta campione cù una sola scunfitta) à a Naziunale trè. U so piazzamentu nantu à u tarrenu, u so sensu di l’anticipazione, u so ghjocu di capu o e so qualità tecniche li permettenu, oghje, di cuntinuà à fà a so strada…

Partager.

Réagir en direct